تراميسو ايطاليه...يم يم

السلام عليكم ورحمة الله

وأنا ألفلف بالنت طلع لي موقع ايطالي فيه طريقة عمل بعض الحلويات وشفت طريقة عمل الــ Tiramisu حسيتها الطريقة الأصلية وقلت أجربو وأنقلو لكم




\إذا أعجبكم شكلو تفضلو تحت المقادير والطريقة





المقادير :


5 صفار بيضات

نصف كوب سكر ناعم

علبتين من جبنة المسكربون وبما انو ماعندنا هالجبنة نقدر نستخدم علبتين فيلادلفيا + علبة قشطة

كريمة من أي نوع ( كريمة خفق / دريم ويب / كريم شانتيه ) مقدار كوبين

ظرف كريم كراميل

ظرف جيلاتين

أي نوع من أنواع القهوة المره

فانيليا

بسكوت الأطفال lady fingers





طريقة العمل :


نجيب صفار البيض ونضيف لو السكر الناعم والفانيليا ونخفقو بالخلاط لمن يتجانس الخليط وننقل الخليط لــ حمام مائي على نار هادية ونخفق لمدة 5 دقائق تقريباً بعدها ننقل الخليط من الماء المغلي لماء بارد جداً ونكمل الخفق لين يبرد الخليط ( طبعاً استغربت من هالطريقة إللي هي نقل الخليط من ماء حار لبارد بس لقيتها بعد التجربة تخلي الخليط متماسك جداً وذو قوام ثقيل زي الكريمة )

تكون الجبنة الفيلادلفيا والقشطة برا الثلاجة بحرارة الغرفة ونضيفها لــ خليط البيض والسكر ونرجع نخفق الخليط مع بعض بخفة ونضيف ظرف الكراميل و3 ملاعق من القهوة المركزة المذابة بماء دافئ

نذيب الجيلاتين بماء مغلي بمقدار نص بيالة موية ونحرك لين يذوب ( الطريقة الأصلية ما كان فيها الجيلاتين بس أضفتو أنا عشان يزيد من تماسك الكريمة وبكل الأحوال ما راح يغيـّـر شي بالطعم ) ونرجع نظيفو لــ الخليط ونخفق

نجيب نوع الكريمة إللي عندنا أنا استخدمت دريم ويب 4 أظرف وكوب حليب بارد وضربتهم بالخلاط لين ارتفعو مره

وبملعقة كبيرة أضفت الكريمة على خليط البيض وبخفة خلطتو بالملعقة من تحت لفوق عشان ما يفش الخليط وما يفقد الإرتفاع

طبعاً ذوقي الخليط إذا حسيتي انو ناقص سكر أضيفي لو زي ما تحبين خاصة إللي بيستخدمون كريمة الخفق عادة ما تكون محلاة بس الدريم ويب والكريم شانتيه فيه نسبة سكر ما نحتاج نزيد شي

وكذا انتيهنا من الكريمة

الحين نذوّب القهوة المره بماء دافي لين تذوب طبعاً نحتاج مقدار كوبين من القهوة ونحطها بـ صحن عميق ( يفضل نسويها قبل الوقت عشان تبرد ما نغمس البسكوت فيها وهي حارة ) أنا استخدمت قهوة اثيوبية حادة وقويه الطعم بس طلعت مره لذيذة

نجيب قالب الحلويات اللي ينفتح والبسكوت والقهوة ، ونبدأ بغمس حبات البسكوت بالقهوة طبعاً لمن نجي نغمس البسكوتة نمسكها بالعرض مو بالطول وننزلها بالقهوة ونطلعها بسرعة قبل لا تتشرب مره وتذوب علينا وتخرب يعني تشريب بسيط مره بس تاخذ نكهة القهوة وشوية رطوبة ، ونصفها بالصينية لين نغطي القاعدة من تحت

نجيب بسكوت جاف من دون تغميس بالقهوة ونصفو على أجناب القاعدة ونضغط على تحت ( البسكوت إللي تحتو يكون طري وراح ينضغط ) عشان يكون البسكوت الجاف بادي من تحت لفوق بشكل مرتب ومتساوي لين نغطي كل القاعدة من جنب ( أنا قصـّــرت من طول البسكوتات بالسكين عشان ما تكون بارزة لفوق مره )

نجيب الكريمة ونحط ربع كميتها فوق البسكوت المشرب بالقهوة

ونرجع نظيف طبقة ثانية من البسكوت فوق الكريمة بعد تغميسو بالقهوة لين يغطي وجه الكريمة

نحط الحين باقي الكريمة كلها فوق طبقة البسكوت ونغطيه بقصدير ونخليه بالثلاجة يوم كامل

قبل التقديم نرش عليه كمية وفيرة من الكاكاو المر ( وإذا حابة يكون بالمره بارد خليه ساعة تقريباً بالفريزر قبل التقديم ) ونفتح القاعدة من الأجناب راح تنفك معانا بسرعة لأنو البسكوت جاف مو ملتصق فيها بس ما يمنع انك تكونين حذرة وقتها ، ونقدمو بالشكل إللي نحب

وتقدرين تعملين التيراميسو بأي قالب أو صينية تحبينها ومو شرط تحطين بالأطراف بسكوت بس كنوع من الترتيب والتغيير

وهذا هو الذ Tiramisu ذقتو وترا الطريقة مره سهلة وسريعة جداً بس أنا أطول بالشرح عشان توضح لكم الطريقة وبالعافية عليكم